Unang bidding sa mga motor pakyas
CEBU, Philippines - Subling mopahigayon og subasta ang Bureau of Customs-Port of Cebu karong Marso 5 kay gamay ra kaayo sa 236 ka nakompiskar nga mga motorsiklo ang nahalin sa unang pagsubasta niadtong Biyernes.
Si Rico Rey Francis “Koko†Holganza, BOC-Cebu legal chief ug hepe sa auction committee, miingon nga duha ka bidders lang ang miapil sa bidding ug 40 ra ka motor ang nahalin nga mokantidad og P280,000.00
Ang presyo sa motorsiklo P7 mil kada usa, apan kinahanglang tagsa ka lot ang paliton nga dunay napulo ka motor. Gilauman nga makakwarta og P1.6 million ang BOC-Cebu sa maong mga motor. Ang maong mga motor gikompiskar sa BOC -Enforcement and Security Services sa nakalabay’ng tuig gikan sa nagkadaiyang mga nag-import niini dinhi sa Kabisay-an.
Matud pa wala mabayri ang mga buhis sa mga nagpasulod sa maong mga motorsiklo mao nga kini gisakmit.
Ang maong mga motorsiklo nga “Fasspider†may 150 cc nga makina ug pulos ginamit gikan sa China ug gihan-ok lang karon sa parkingan sa BOC sud na sa usa ka tuig.
Matud pang Holganza human makuha sa duha ka bidders niadtong Biyernes ang ilang mga motorsiklo, gi-withdraw usab nila ang ilang mga bonds, timailhan nga dili na sila moapil sa sunod nga bidding.
"So far, wala pay new bidder," matud pang Holganza. Kun pakyas gihapon ang ikaduhang bidding, mosumitir sila og report sa Negotiated Sale Committee sa BOC-Manila aron maoy padesisyonon. Sumala pa nga gimahalan ra gyud ang duha ka bidders sa presyo apan si Holganza nagkanayon nga di sila maoy nagbuot sa presyo niini. (BANAT NEWS)
- Latest
