Mga NGO nga mitabang ipalista ni Ouano

CEBU, Philippines - Giawhag ni Board Member Thadeo Ouano sa ikaunom nga distrito sa lalawigan sa Sugbo ang mga lokal nga kagamhanan sa amihanang bahin sa lalawigan sa pagsumitir sa listahan sa mga Non Governmental Organization (NGO) nga nakapadangat og hinabang human sa pagkuso-kuso sa bagyong Yolanda.

Tumong ni Ouano nga mapasalamatan sila pinaagi sa pagpalabang og resolusyon sa nahimo nilang tabang ngadto sa mga biktima ni Yolanda.

Ang mga pribadong sektor giingong maoy nag-una sa pagpanghatag og hinabang sama sa mga pagkaon ngadto sa mga naapektohan sa bagyo.

“Maayo nga makakuha ta og listahan sa mga pangalan sa NGO o pribadong pundok nga nakatampo sa pagtabang sa mga biktima aron pod ma-acknowledge sila sa bayanihon nilang gihimo,” ni Ouano pa.

Uban sa mga NGO dili lang mga pagkaon ang gipanghatag lakip na ang mga housing materials ug mga materyal sa paggama og mga bangka nga dunay motor alang sa mga mananagat nga nawad-an sa ilang panginabuhian.

Sa nasayran si Ouano maoy nagpalabang sa resolution No. 1640-2013  nga nagpadayag og suporta sa Department of Agriculture and Bureau of Fisheries and  Aquatic Resources (DA-BFAR) sa rehabilitation initiative nga gitawag og “Ahon Sampunglibong  bangka para sa Dalawampunglibong Pamilya.” (BANAT NEWS)