CEBU, Philippines - Duha ka menor de edad kinsa gipasanginlan nga nangawat og cable wire sa Philippine Long Distance Telephone (PLDT) ang nasikop sa kapolisan samtang laing duha ka menor ang gipasakaan og kaso tungod sa pagpanulis.
Ang pagpangawat nahitabo niadtong milabay’ng kadlawon diha sa Sitio Upper Gun Club, Barangay Guadalupe, dakbayan sa Sugbo. Ang duha ka menor kinsa nagpanuigon og 16 ug 17-anyos giingong uban ni John Gonzaga, 25, nga residente sa nahisgutang barangay kinsa nasikop usab sa mga polis.
Ang kapolisan daling miresponde human makadawat og report kabahin sa insidente sa kawat sa cable sa PLDT diha sa lugar ug giingong ang tulo ka suspetsado naabtan sa mga polis nga miputol ug mihakot sa kable.
Giingong na-recover sa mga polis gikan sa posisyon sa mga suspetsado ang mga pinutol nga kable ug ang motorsiklo nga ilang gisakyan.
Ang mga suspetsado temporaryong gitanggong diha sa Guadalupe Police Station.
Sa laing bahin, ang mga suspetsado sa pagpanulis kinsa duha niini menor ang napasakaan na og kaso.
Ang giingong uban sa duha ka menor nga napasakaan og kaso mao si Sidmark Bayking.
Giingong napamatud-an nga dunay basehanan ang pamasangil batok sa tulo atol sa summary inquest proceeding nga gipahigayon ni Cebu City Prosecutor II nga si Mary Ann Castro.
Ang maong kaso gipasaka na ngadto sa Regional Trial Court (RTC) sa Branch 6. (BANAT NEWS)