Mandaue city himoa’g duha ka distrito
CEBU, Philippines - Gihangop ni 6th District Board Member Thadeo Ouano ang pagbanhaw og balik sa hisgotanan labot sa paghimo nga Lone Congressional District sa dakbayan sa Mandaue, apan ang gusto niya nga mahitabo duha ka distrito ang himuon sa Mandaue.
Tuig 1990 unang gisugdan ni kanhi kongresista Efren Herrera nga konsehal na karon sa dakbayan sa Lapu-Lapu ang maong tinguha apan tungod kay wa pa mahimong highly urbanized city ang Mandaue nasangit kini sa Senado.
Dihang mipuli si kanhi kongresista Nerissa Soon-Ruiz nahimong highly urbanized city ang siyudad ug napadaplin ang tinguhang madeklarar nga Lone District ang Mandaue City, naunhan hinuon kini sa Lapu-Lapu City.
Nabuhi kini pagbalik tungod sa lakang nga gihimo ni Kongresista Wilfredo Caminero nga buakon ang Segundo Distrito ug himuon kining duha ka distrito.
Si 6th District Board Member Arliegh Sitoy miingon nga kung maaprubahan ang tinguha ni Caminero sa Segundo Distrito angayan usab nga iduso pagbalik ang tinguha sa Mandaue City.
Apan si Ouano nagkanayon nga mas maayong mohimo og dugang duha ka distrito sa Mandaue City, ang north ug south districts. Gusto niya nga ang Cordova masakop sa south samtang ang Consolacion sa north.
Subay sa National Statistic Coordination Board sa National Statistic Office ang Mandaue City duna karoy 331,320 nga populasyon. Kung idugang ang populasyon sa Cordova ug Consolacion, ingon man ang mga incomes sa duha ug land areas dako ang purohan nga mopasar sila sa mga rekisitos. (BANAT NEWS)
- Latest
