CEBU, Philippines - Gimando ni Police Regional Office (PRO)-7 director Danilo Constantino nga imbestigahon ang kapolisan sa Talisay ubos ni Supt. Resty Santos kalabot sa pasangil nga dunay mga polis sa maong dakbayan nga protektor sa ilegal nga drugas.
Gimandoan na ni Constantino ang Regional Intelligence Division sa pag-imbestigar sa report may kalambigitan sa gihimong raid sa National Bureau of Investigation (NBI)-7 didto sa Barangay Tabunok nga miresulta sa pagkasikop nila ni Jason Narido ug Nilo Abendan.
Nasikop sab sila si Romy Montalbo, Welbert Lopez, Mariano Risona, Dirk Lester Inoc, Marian Bas, Rolando Racasa ug Philip Christian Loyloy nga naatlan sa NBI didto sa lugar.
Nakuhaan si Abendan og usa ka bulto nga shabu, 110 ka gagmay nga putos sa shabu, ug 45 kalibre nga pistola nga may pito ka bala ug P11 mil nga salapi nga gituohang halin niini sa pagpamaligya og shabu.
Samtang 60 ka gagmay nga pakete nga shabu ug drug paraphernalia, duha ka cellphones ang nasakmit usab gikan ni Narido.
Si Supt. Santos nga nahinabi sa Banat News miingon nga andam siya nga mobiya sa iyang katungdanan kung mapamatud-an nga adunay mga operasyon sa NBI nga wala magmalampuson dihang mi-coordinate sila ngadto kaniya.
“Nakuratan lang gani ko gahapon, kaduha na kuno ni nga nasunog ang duha nila ka operation,†sumala pa ni Supt. Santos.
Matud sa hepe sa Talisay police nga iyang gi-welcome ang si bisan kinsa nga mga law enforcement agencies nga maghimo og raid sa Talisay bisan walay pananghid sa iyang opisina.
Midugang si Santos nga dili makiangayon alang kaniya nga pasanginlan apan hangpon niya ang imbestigasyon aron masuta kun kinsa gyud ang protector sa mga druglord ug kakunsabo sa operation sa maong siyudad.
Gihagit hinuon ni Supt. Santos ang mga mipasangil nga mopakita og ebidensya. (BANAT NEWS)