CEBU, Philippines - Usa ka bana ang gidakop human niya gidunggab ang call center agent niyang asawa tungod lang sa pagduda nga may laing lalaki kini nga gikarelasyon.
Ang pagpanunggab nahitabo didto sa ilang panimalay sa Sitio Mohon II, Barangay Tisa, dakbayan sa Sugbo.
Ang biktima naila nga si Geraldine Gera, 31, samtang ang suspetsado naila usab nga si Glenn Gera, 31, nga usa ka vendor.
Base sa imbestigasyon sa kapolisan nga ang magtiayon naghigda sa ilang kama sulod sa ilang kwarto dihang gipangutana niya ang iyang asawa kun aduna ba kini laing gikarelasyon.
Tungod kay wala motug-an, ang bana mikalit og bangon ug miadto sa kusina.
Pagbalik sa bana sa kwarto nagdala na kini og kutsilyo ug gikomprontase pag-usab ang iyang asawa ug gipugos pagpatug-an kun duna ba kini laing karelasyon apan hugot kining gihimakak sa biktima.
Tungod niini, gidunggab sa bana ang asawa sa makadaghang higayon diha sa lawas, tuo nga dapi-dapi ug sa iyang wala nga kamot.
Ang biktima gidala gihapon sa suspek ngadto sa Cebu City Medical Center diin kini gidakop sa gwardya sa hospital nga si Manolito Aloro ug gi-turnover ngadto sa kapolisan.
Ang manghod sa biktima mao nay mihatag ngadto sa kapolisan sa kutsilyo nga gigamit sa krimen. (BANAT NEWS)