CEBU, Philippines - Si Konsehal Alvin Dizon miawhag sa kadagkoan sa City Traffic Operations Management (CITOM) nga ayuhon pagmentinar ang trapiko diha sa palibot sa flyover sa Barangay Banilad.
Si Dizon nga anaa magpuyo duol sa flyover nakabantay nga usahay walay traffic enforcers nga magbantay sa mao nga dapit hinungdan nga ang mga abusado’ng drayber mohimo’g mga binuang.
Matud sa konsehal nga ang iyang nabantayan nga adunay mga drayber nga ipakuliot gayud ang ilang mga sakyanan inigkaduol na sa entrada sa flyover.
Gusto ni Dizon nga aduna g’yuy traffic enforcer nga anha kanunay idistino. Ang mao nga dapit diha gipusil ug gipatay ang usa ka traffic enforcer nga nagbarog daplin sa karsada.
Gisugyot ni Dizon nga angay’ng hingusgan pag-ayo sa CITOM ang pagtudlo og leksyon sa mga madakpan nga mga draybers nga hayan nakalimot na sa tukma nga paagi sa pagmaneho’g sakyanan. (BANAT NEWS)