Daghang PUJ drivers supak pagbutang og bicycle lane
CEBU, Philippines - Daghang drayber og mga passenger jeepneys nga sagad anha mag-agian sa kanhi San Jose dela Montaña, karon Pope John Paul II Avenue, supak nga ibanan ang karsada aron gamiton para lang sa mga bisekleta.
Si Jeffrey Calino ug Noel Rosell, pulos mga PUJ drivers nga ang rota SM ug Lahug, miingon nga makapasamot lang sa problema sa trapiko ang pagbutang og bicycle lane sa mao nga karsada.
Dunay laraw si Konsehal Nida Cabrera nga ang mga tiggamit og bisekleta hatagan gayud og ilang agianan aron dili sila mamelegro nga madam-agan og mga sakyanan.
Apan sila si Calino ug Rosell miingon nga ang ilang mga kaubang drayber susama usab kanila og baruganan.
Ang Pope John Paul II Avenue, ang karsada nga nagdugtong sa Barangay Mabolo paingon sa Barangay Luz, kanunay nga maghuot sa mga sakyanan sa hapit tanang oras, ilabi na sa gabii.
Nabantayan nga ang mao nga karsada adunay lapad ra nga “center-island†nga kun kini panipsan mahimong makatabang sa pagpalapad og gamay sa karsada.
Apan ang executive officer sa City Traffic Operations Management (CITOM) nga si Rafael Christopher Yap miingon nga ang mga center islands mahinungdanon usab aron maprotehean ang mga pedestrians. (BANAT NEWS)
- Latest
