CEBU, Philippines - Upat ka tawo ang nasikop sa Parian Police Station sa kampanya niini sa ilegal nga sugal sa miaging adlaw.
Ang nasikop mao sila si Ignacio Apostadero, 57, taga Cogon, Dumanjug; Isdelito Baring, 39, molupyo sa dalan Bonifacio sa dakbayan sa Sugbo; Mario Apolinar, 29, taga Basak San Nicolas; ug si Biano Florentino, 54, taga M.H. del Pilar sa dakbayan sa Sugbo. Unang nasikop si Apostadero pasado alas 5:20 sa buntag niadtong Biyernes nga naaktohan nga naghatod og mga tip sheets sa masiao sa dalan Junquera sa barangay Kamagayan.
Narekober gikan kang Apostadero ang 215 ka tip sheets ug gidala kini sa maong estasyonan aron mapasakaan og kaso. Paglabay sa 3-minutos nasikop sab si Baring nga nagdala og 2,875 ka tip sheets sa masiao, samang oras usab nasikop si Apolinar sa kapolisan nga nagdala og 550 sa tip sheets. Napulo ka minuto ang milabay nasikop sab si Florentino nga may dala nga 650 ka tip sheets sa masiao.
Pasakaan og kasong kalapasan sa RA 9287 o illegal gambling ang mga nangasikop.
Ang maong mga tawo nasikop tungod kay gihingusgan nga kampanya sa kapolisan batok sa ilegal nga sugal. (/EIM)(BANAT NEWS)