Laundry shop gitulis

CEBU, Philippines - Gitulis sa nag-helmet nga duha ka armadong lalaki ang usa ka laundry shop   diha sa dalan J. P. Rizal, barangay Jagobiao, dakbayan sa Mandaue kagahapon sa buntag.

Si SPO1 Gregorio Cabisarez sa kapolisan sa Presinto 3 sa Mandaue City Police Office (MCPO) miingon nga ang maong laundry shop gipanag-iya ni Grace Semilla, walay gwardiya gawas lang sa duha ka trabahante nga nag-stay in nga sila si Arlene Lumen, 52, ug Eril Calatraba, 52.

Matud pa ni Cabisarez nga nakurat ang mga biktima tungod sa kusog kaayong pagpanuktok sa ilang pultahan mao nga ilaha kining giablihan aron unta balibaran ang tawo sa gawas kay di man sila modawat og labada sa adlaw nga Domingo.            Apan sa pag-abli nila sa pultahan kalit lang misulod ang wala hiilhing lalaki nga nagtion sa armas ug mideklarar nga tulis uban ang pasidaan kanila nga pamatyon kun mosaba.

Ang kauban nga nagsul-ob usab usab og closed- type helmet nagpabilin nga nagsakay sa pula nga motorsiklo nga nagpaabot sa gawas nga nagsilbing lookout.

Si Cabisarez miingon nga gimandoan sa mga tulisan ang duha kun asa ilang butangan og kwarta hinungdan nga nakuha gyud sa ilang kaha ang P5,000 nga cash ug ang lap top nga nagkantidad og P40,000.Human niini, daling nangikyas ang mga tulisan luwan sa motorsiklo padung sa Consolacion samtang igo nalang sa pagpa-blotter ang mga biktima sa kapolisan. (/EIM)(BANAT NEWS)