CEBU, Philippines - Patay ang drayber samtang angol ang duha niya ka angkas human sila nabangga sa konkreto nga kaang pasado ala-una sa kadlawn sa miaging adlaw sa barangay Tuble sa lungsod sa Moalboal.
Ang namatay naila nga si Ronald Arong, 18, taga Tunga, Moalboal, samtang angol sila si Jason Gaballo, 20, taga sitio Pooc, Poblacion West, ug si Kenneth Legarte, taga Poblacion West sa Moalboal.
Base sa imbestigasyon sa kapolisan nga ang namatay maoy nagdrayb sa motor ug padulong unta sa barangay Saavedra sa maong lungsod.
Apan dihang naabot na sila sa barangay Tuble nawad-an og kontrol ang maong drayber sa manobela ug nitipas sila sa pikas lane dayon nabangga sa usa ka kongkreto nga kaang kilid sa dalan maong nangalagpot silang tanan.
Daling gidala sa tambalanan ang mga biktima sa mga miresponde nga polis nga sila si PO3 Ramon Chinel, PO1 Arnold Sergio, PO1 Melvin Delica ngadto sa tambalanan.
Apan pag-abot sa Badian District Hospital patay na si Arong samtang ang duha ka mga kauban niini gibalhin usab sa Vicente Sotto Memorial Medical Center tungod sa grabeng kadaot nga naangkon sa ilang kalawasan.
Nasuta sa imbestigasyon nga wala’y lisensya ang nagmaneho sa motorsiklo nga si Arong. (/EIM)(BANAT NEWS)