CEBU, Philippines - Katorse ka kawani sa Barangay Tisa, dakbayan sa Sugbo namatud-an nga positibo sa paggamit og gidili nga matang sa illegal nga drugas – ilabi na ang shabu.
Si Kapitan Philip Zafra, presidente sa Association of Barangay Councils (ABC), mora’g dili makatoo nga ingon niini kadaghan ang mga drug users sa iyang mga kawani sa barangay.
Dul-an sa 150 ka kawani sa Barangay Tisa ang gipakalitan pag-drug test kaniadto pa’ng Pebrero 10 apan wala dayon kini ipahibalo sa mga tinugyanan sa City Office for Substance-Abuse Prevention (COSAP).
Nagdumili hinoon sila si Zafra ug COSAP chief Alice Utlang sa pagbutyag sa ngalan sa mga kawani sa Barangay Tisa nga namatud-an nga positibo sa shabu. Si Zafra mismo maoy mihangyo sa COSAP nga himoan og drug test ang iyang mga kawani.
Matud ni Zafra nga namatud-an nga positibo g’yud sa confirmatory test nga ang 14 ka kawani sa iyang barangay positibo sa paggamit og shabu.
Si Zafra nga konsehal usab sa dakbayan isip representante sa mga opisyal sa barangay, namahayag nga kadtong napositibo sa paggamit og gidili nga matang sa drugas dili na i-renew ang ilang kontrata.
Matud ni Dr. Utlang nga aduna pay tulo ka laing mga barangay kang kansang mga kapitan miawhag usab nga ipa-drugtest ang ilang mga kawani.
Aron pagpakita nga sinsero sila sa kampanya batok sa tiggamitan og gidili nga drugas, si Mayor Michael Rama, Vice Mayor Edgar Labella ug ang tanang konsehal nagpakuha usab og drugtest ug walay bisan usa kanila nga napositibo. (BANAT NEWS)