CEBU, Philippines - Nabalhog og usa ka gabii sulod sa prisohan sa Police Station 2 sa Cebu City Police Office ang usa ka Australian national ug ang usa ka bayot human sila nadakpan sa akto nga nag-oral sex sa sulod sa usa ka pansayan sa mall sa uptown area sa siyudad sa Sugbo kaniadtong Huwebes pasado alas 11:00 ang takna sa gabii.
Ang 38-anyos nga Australian (pangalan gipugngan sa Banat News) tinun-an sa usa ka unibersidad dinhi sa dakbayan sa kurso nga Medical Technology ug temporaryong nagpuyo sa usa ka hotel dinhi sa Sugbo.
Samtang ang bayot nga iyang kapares sa maong malaw-ay nga buhat mao ang 33-anyos nga taga Barangay Lorega-San Miguel ning syudad sa Sugbo.
Ang security guard sa mall nga si Rudie Arda, 35, maoy nisikop sa duha ug personal nga mitugyan kanila ngadto sa kapolisan sa Police Station 2.
Matud sa gwardya nga atol sa iyang pag-roving ug pagsusi sa pansayan sa mga lalaki iyang nakit-an sa akto nga nagluhod pa ang bayot nga mimaneho sa kinatawo sa nahisgutang langyaw.
Tungod sa gihimong eskandalo sa duha gidakop kini sa maong gwardiya.
Sulod sa selda, ang mga dinakpan nagdumili hinuon pagtubag sa pangutana sa mga sakop sa media kun tinuod ba ang gipasangil sa security guard. Apan ang mga sakop sa Fuente Police Station napugos pagbuhi sa duha niadtong Biyernes sa hapon tungod sa kapakyas sa gwardya pagbalik sa police station alang sa pagpasaka unta og tukmang kaso batok sa duha ka mga dinakpan. (BANAT NEWS)