CEBU, Philippines - Usa ka 20-anyos nga drayber og traysikad gidakop sa mga polis kay ilang nasakmitan og pito ka paketeng shabu atol sa gipahingusgan nga kampanya batok sa gidili nga drugas didto sa Sitio Tunga, Barangay Tanke, dakbayan sa Talisay kagahapon sa buntag.
Si Arnel Borja, nagpuyo sa Sitio Tunga gidakop sa mga polis nga gipangulohan ni Inspector Rogene Fudotan miresponde sa mao nga dapit kay nakadawat sila og inpormasyon sa illegal nga kalihukan sa suspek.
Matud ni PO2 Esmer Gahi nga nabantayan nila si Borja nga nagbarog daplin sa karsada nga adunay gibitbit nga kolor blue nga gamay’ng medicine container.
Dihang nakakita si Borja sa mga polis, nagdali kini nga milakaw palayo apan gitawag siya sa mga tinugyanan sa balaod ug gipaukab ang nahisgutang medicine container ug nakita ang mga pakete sa shabu.
Si Borja gidala sa Talisay City Police Station ug gikatakda nga karong adlawa pasakaan kini og kasong paghupot og ginadiling drugas. (BANAT NEWS)