Las Vegas KTV pabuksan?
CEBU, Philippines - Ang mga sakop sa Cebu City Anti-Indecency Board (CAIB) magtigum karong adlawa ug posible nga hukman na nila kun pabuksan ba pagbalik ang gisirad-an nga Las Vegas KTV Bar sa Barangay Mabolo.
Ang Las Vegas KTV Bar gisirad-an sa City Hall tungod sa pagpasundayag og law-ay nga talan-awon ngadto sa ilang mga kustomer.
Si Ma. Kristina Mondragon nga maoy aplikante sa business permit didto sa City Hall mipasalig gayud nga dili sila mohimo og malaw-ay nga buhat kun aprobahan ni Mayor Michael Rama ang giaplay nila nga permit.
Matud ni Mondragon nga ang ilang negosyo pagatawgon na unya og San Francisco Resto and Entertainment Hall, pagkaon ug ginagmay nga mainom sa ilang kustomer.
Samtang magkaon ang mga kustomer adunay mga live bands nga magtukar aron molingaw sa mga nagkaon. Si Mondragon nakasumiter na sa gipangayo nga floor plans sa pagamugnaon nga kan-anan.
Ang ordinansa naglatid nga ang usa ka balay-patigayon nga masirad-an sa paglapas sa Anti-Indecency Ordinance dili mabuksan sulod sa usa ka tuig gawas lang kun lahi na nga negosyo ang ipahigayon. (BANAT NEWS)
- Latest
