CEBU, Philippines - Ang Assistant City Engineer sa Talisay nga si Gamaliel Vicente, Jr. mihulagway nga malisyoso ang gihimo sa usa ka job order (JO) nga kawani nga miawhag sa Ombudsman-Visayas nga siya imbestigahon.
Si Kevin Juezan, nadistino sa opisina sa Sangguniang Panlungsod (SP) miawhag sa Ombudsman-Visayas nga si Vicente imbestigahon uban sa mga sakop sa Technical Working Group (TWG).
Gihimo ni Juezan ang awhag human nga nasuta sa Commission on Audit (COA) nga ang dakbayan sa Talisay migasto og P5.8 milyones sa ubang mga transaksiyon nga giingong gisuportahan og mga pekeng dokumento.
Sa press conference kagahapon, si Vicente nagkanayon nga “misleading†ug dunay malisya ang maong reklamo ni Juezan batok kaniya ug sa mga miyembro sa TWG.
Matud ni Vicente nga si Juezan nahatagan lang og sayop nga kasayuran ug mao nga kadudahan nga dunay nagsugo kang Juezan sa pagpasaka og reklamo batok kaniya.
Sa pakisusi ni Vicente ngadto sa Human Resource Department sa Talisay City Hall iyang nasuta nga si Juezan nakatrabaho kini sa dakbayan isip JO diha sa SP ubos sa quota ni Bise Mayor Romeo Villarante niadtong Hulyo 1, 2013. (BANAT NEWS)