CEBU, Philippines - Gihulagway nga "good provider" ug matinabangon. Mao kini ang paghulagway sa mga suod nga higala ug silingan sa gibanhigan-patay nga manlalaban nga si Noel Archival kinsa gipatay kagahapon sa lungsod sa Dalaguete human mitambong og hearing sa Dumaguete City.
Ang reporter sa The Freeman nga si Flor Perolina maoy gidangpan sa asawa ni Archival dihang nahitabo ang maong pagpamusil.
"Ako siyang gitawgan when I heard about the ambush. Wala pa siya’y kalibutan ato. Ang iya rang nahibaw-an nga naaksidente iyang bana. Wala pay confirmation nga patay gyud," matud ni Perolina.
Human makompirmar, nagkita si Perolina ug ang asawa ni Archival nga si Ellen dala ang mga anak niini.
"Iyang gikuha sa eskwelahan ang tulo ka mga bata. Kahibaw na sila naunsa ilang Tatay. Ang duha ka anak nila nga mga gagmay pa maoy wala pa kahibaw unsay nahitabo," si Perolina namulong.
Ang mipanaw nga manlalaban dunay lima ka anak nga nag-edad ug 12 (babaye), 11 (babaye), 10 (lalake), 4 (lalake), ug 3 (babaye).
"No premonition at all. Mibiya siya sa ilang balay mga pasado alas tres sa kaadlawon kay naa lagi hearing sa Dumaguete. Gabii, naa silay visitor nga usa ka police with a companion nga woman ug lalake.
Nahuman sila’g estorya mga 10:30pm sa ilang house sa Talamban. Ganina (gahapon), while nag pauli kuno gikan sa Dumaguete, nagsige og text ang tubag sa iyang asawa puro ra K ang tubag. Mga 1:30pm naestorya pa niya iyang brother in law. Mao na dayon to gi-ambush na," matud pang Perolina.
Niadtong Domingo, misalmot pa ang tibuok pamilya niini sa usa ka marathon nga gipasiugdahan sa usa ka dakong mall sa Cebu City isip pagpakita’g suporta sa iyang mga anak nga mga nahilig sa athletics.
Dugang niya, usa kini ka maayo nga silingan kinsa nakatabang sa halos tanan nga nagpuyo sa ilang subdivision.
"As a neighbor, tanan dinhi sa amoa walay silingan nga wala natabangi be it financial, legal. Personally manggihatagon. Naay kaugalingon nga foundation sa family. Calamities ming distribute. Manggihatagon. Good family provider," siya namahayag.
Gani, nagplano pa unta ang ilang duha ka pamilya nga mamakasyon sa Hongkong.
Natawo si Archival niadtong November 20, 1962, si Archival gradwado sa abogasya sa Southwestern University samtang sa University of San Jose-Recoletos siya nahuman sa kolehiyo.
Siya nahimong manlalaban sulod sa 21 ka tuig sa wala pa banhigi-patay.
Naila siya sa iyang mga drug-related nga mga kaso ingon man isip abogado ni Ruben Ecleo kinsa wanted na karon sa kasong pagpatay sa kaugalingong asawa.
Matud sa iyang asawa, kanunay daw niyang gipasidan-an si Archival sa iyang seguridad apan magkumpyansa ra gyud kini.
Duna pa unta siyay laing hearing nga tambungan sa Mindanao karong Biyernes.
Ang gipatay nga manlalaban ikaduhang manghod ni Cebu City Councilor Nestor Archival kinsa maoy kinamaguwangan sa upat ka managsuong lalake. (BANAT NEWS)