IBP-Cebu mikondenar sa pagpatay ni Archival

CEBU, Philippines - Gkondenar sa Integrated Bar of the Philippines ang pag-ambush patay kang Atty. Noel Archival ug sa mga kaubanan niini kagahapon diha sa barangay Corro sa lungsod sa Dalaguete. Si Atty. Mae Elaine Bathan, presidente sa Integrated Bar of the Philippines (IBP) Cebu City chapter mibutyag sa Banat News nga ang pagkamatay ni Archival usa ka masulob-ong balita. Matud niya si Archival usa ka respetadong tawo ug naila sa iyang pagkasi-aw sud ug gawas sa korte. Iya usab nga giingon nga dili kini first time nahitabo kay duna na usab abogado nga gipamatay kaniadto.

Si Bathan nanawagan sa Philippine National Police (PNP) nga paspasan ang imbestigasyon aron mailhan ang responsable sa maong pagpatay.  

Samtang si Atty. Earl Bonachita, kanhi IBP president  sa Cebu City chapter nagkanayon nga si Archival usa ka “most visible lawyer” sa courtrooms tungod sa kadaghang mga kaso nga gikuptan niini.

Matud niya the “act of killing Archival was highly condemnable.” Ang ubang mga abogado nga sila si Atty. Filmore Gomos, Atty. Cornelio Mercado, Atty. Delfin Quilaquil ug Cebu Provincial Prosecutor Pepita Jane Petralba nagkanayon nga ang kamatayon ni Archival usa ka masulob-ong adlaw sa propesyon sa balaod.

Matud pang Quilaquil ang duha ka chapters sa IBP sa Cebu gikatakdang mopagawas og resolusyon nga magkondenar sa maong pagpatay. Si Archival miyembro sa IBP Cebu Province Chapter. (BANAT NEWS)