CEBU, Philippines - Duha ka batang estudyante nga giingong gidagmalan sa ilang magtutudlo ibalhin na lang og tunghaan matud pa ni Vice-Governor Agnes Magpale.
Kahinumduman nga ang duha ka bata gikuyogan sa ilang mga inahan nangayo og tabang kang Magpale ug misumbong sa giingong pagpamunal kanila ni Jefferson Gornes, usa ka grade six school teacher sa Basak Elementary School sa Badian.
Matud pa sa mga bata nga mahadlok na sila nga mobalik pa sa ilang eskuylahan ug buot nila nga mobalhin og eskuylahan samtang anaa pa ang maestro nagtudlo sa maong eskuylahan.
Niadtong miaging semana napasaka na ang kasong child abuse batok sa maestro didto sa Cebu Provincial Prosecutor’s Office.
Base sa dokumento gibunalan ang mga bata og electric wire. Sa pakighinabi sa Banat News ning bag-ohay lang kang Gornes, miangkon kini nga iyang nabunalan ang mga bata kay magsige og duwa gawas sa iyang classroom.
Matud niya usa kini ka matang sa pagdisiplina apan iyang giangkon nga sayop ang iyang gibuhat ug nangayo na siya og pasaylo sa mga ginikanan ug sa mga bata ug gani gipasaylo na siya.
Apan nahibulong siya karon nga nidako ang maong issue human sila gipatawag sa principal.
Nagtuo si Gornez nga dunay nagsige og sulsol sa mga ginikanan sa mga bata ug ang gidudahan niya mao ang ilang silingan nga dugay nang may pagdumot kaniya.
Matud usab ni Magpale nga hasta ang nitabang sa mga bata aron mosumbong gikatahong gihasi usab maong mihangyo siya sa mga polis sa Badian nga bantayan ang nitabang sa mga bata.
Sa pagkakaron, pangitaan nila og temporaryong kapuy-an ang pamilya sa mga bata ingon man ang ilang kabalhinang eskuylahan. (/EIM)(BANAT NEWS)