Magbantay og pasyente hatagan og pagkaon

CEBU, Philippines -  Ang mga kabus nga magbantay og pasyente nga ma-admit sa ospital diha sa Talisay makahimo pagpamarayeg og pagkaon ngadto ni Mayor Johnny V. De Los Reyes.

Matud ni Vincie Monterde nga maoy public information officer (PIO) sa dakbayan sa Talisay nga anaa ra sa mayor kun kanunay ba siya nga mohatag kun magbalik-balik ang mga tawo kaniya pagpangayo og kupon.

Ang kupon nga bali ra’g P20 adto ihatag sa canteen sa ospital ug ang gihatagan sa mayor taksan sila og usa lang ka order nga rice, ug usa ka ordinaryo nga sud-an, walay labot ang softdrinks kun sila moinom. Si Monterde miingon nga dugay na kining gihimo ni Mayor JVR kaniadto bisan og wala pa siya mahimo nga mayor. Ang kwarta nga ibayad sa mayor didto sa canteen gikan sa kaugalingon niyang bulsa ug dili gikan sa kagamhanan, matud ni Monterde.

Gipasabot ni Monterde nga nahuna-hunaan sa mayor ang sitwasyon sa mga magbantay og pasyente nga walay labot sa rasyon sa pagkaon gikan sa ospital mao nga nakahukom siya nga sila tabangan.

Sa una si JVR mosuroy usab sa Vicente Sotto Memorial Medical Center (VSMMC) ug manghatag og kupon diin adto gihapon sa canteen sa ospital mapahimuslan sa mga kabus ang pagkuha og pagkaon.

Matud ni Monterde nga ang mga kawani sa Talisay City Social Welfare Office gimanduan usab sa mayor nga pahatagan og mga kupon kadtong mga gigutom nga moanha sa ilang buhatan nga mangayo og tabang.  (BANAT NEWS)