Bagsik nga pusher nadakpan g’yud

CEBU, Philippines -  Giila nga bagsik ug idlas nga drug pusher sa Barangay Maguikay, dakbayan sa Mandaue nadakpan sa kapolisan ug nasakmitan pa’g high-powered nga armas kagahapon sa buntag.

Si Dario Loberanes, 39, walay trabaho ug nagpuyo sa Sitio Salvacion, Barangay Maguikay, dakbayan sa Mandaue, nadakpan human nga gireklamo sa pagpanion og armas ngadto sa amahan ug anak nga iyang silingan.

Usa ka KG9 nga armas ang giingong gition ni Loberanes ngadto kanila ni Crisanto Roble, 42, ug sa anak-dalagita niini nga si Cristine, bisan og walay igong hinungdan. Si Loberanes maoy giingon nga suspek sa pagpusil ug pagpatay sa usa ka Alley Fajardo nga ila ra’ng silingan kaniadtong Nobiyembre apan mitahan kini sa kapolisan human sa maong hitabo.

Kaso ra nga homicide ang gipasaka sa kapolisan batok ni Loberanes maoy rason nga nakabutang kini og pyansa sa hukmanan ug nakagawas sa bilanggoan. Matud ni PO3 Antonio Descartin, sakop sa Presinto 4 sa Mandaue City Police Office (MCPO), nga nakadawat sila’g alarma nga nanion og armas si Loberanes kagahapon sa buntag.          

Dali nga girespondehan nila ni PO3 Descartin ang maong alarma ug ilang nakit-an ang suspek nga nagdala sa KG9 nga armas. Human kini gidakop ug girekisa ang bulsa sa karsones, nakuha nila ang duha ka paketeng shabu.

Si Loberanes nga nabalhug pagbalik sa bilanggoan pasakaan na usab og kaso nga paglapas sa Firearm’s Law kay wala’y lisensya ang armas nga nakuha gikan kaniya ug sa pagdala og duha ka pakete nga shabu. Nadakpan ‘sab sa kapolisan ang usa ka gitumbok nga drug pusher didto sa Sitio Ihawan, Barangay Mantuyong, dakbayan sa Mandaue human kini masakmiti og tulo ka paketeng shabu sa gipahigayong buy-bust operation kaniadtong Sabado sa hapon. Si Morwin Opora, 30, ulitawo ug walay trabaho nga nagpuyo sa Barangay Mantuyong nadakpan sa kapolisan nga gipangulohan mismo ni Chief Inspector Jimmy Aguisanda, ang hepe sa Presinto 1 sa Mandaue City Police Office.

Matud ni PO2 Jesson Estrera nga si Opora dugay na nila nga gipanid-an sa illegal niya’ng kalihokan ug namatud-an nga tinuod ang report nga ilang nadawat nga nalambigit  si Opora sa pagpamaligya og shabu. Si PO2 Estrera miingon nga ang ilang kauban nga polis maoy nagsilbi nga  police decoy ug nagpatuo nga mopalit kini og shabu. Matud ni Estrera nga gisulayan sa ilang police decoy pagpalit og shabu si Opora ug dihang mitunol na kini sa duha ka putos nga shabu ug gidawat ang marked money nga P200.00 dali nga gidakop nila ang suspek.

Gikatakda  karong adlawa ang suspek pasakaan og kaso adto sa piskaliya nga paglapas sa Republic Act 9165 kon Comprehensive Dangerous Drugs Act.  (BANAT NEWS)