Nagdinunggabay tungod sa P10
CEBU, Philippines - Patay ang usa ka drayber sa taxi human nagkadinunggabay ug sa laing taxi driver nga iyang kainom kay nagkalalis tungod lang sa P10 nga kuwang sa sukli nga giuli sa asawa sa suspek.
Ang dinunggabay nahitabo kagahapon didto sa Sitio Bugta-i, Barangay Calajo-an, lungsod sa Minglanilla.
Ang namatay mao si Nestor Baguio, 58, residente sa Barangay Calajoan samtang ang midunggab kaniya mao ang iyang silingang si Serafin Sumampong, 53, nga naangol usab human mabasli og dunggab sa dughan ni Baguio gamit ang screw driver.
Si Senior Inspector Richard Gadingan, hepe sa Minglanilla Police Station mibutyag sa Banat News nga sa wala pa mahitabo ang insidente si Baguio ug Sumampong nakig-inom sa ubang estambay.
Giingong nagkalalis ang duha nga miresulta sa sinukmagay tungod kay nasuko si Sumampong human gipasanginlan ni Baguio ang iyang asawa nga kuwang og P10 ang sukli nga giuli human niya gisugo pagpalit og ilimnon.
Ang duha nauwang unta sa mga kainom apan si Sumampong miuli ug dayon mibalik nga nagbitbit na og kutsilyo dayon gidunggab niini si Baguio.
Si Baguio kinsa nakaangkon og samad dinunggaban sa walang bahin sa dughan nakabalos og dunggab sa dughan ni Sumampong gamit ang screw driver.
Daling gidala ngadto sa Minglanilla District Hospital si Baguio patay na kini sa pag-abot sa maong tambalanan. Samtang si Sumampong nalandig kini ngadto sa Vicente Sotto Memorial Medical Center.
Matud ni Gadingan nga si Sumampong gipabantayan niya og polis ngadto sa tambalanan ug karong adlawa (Lunes) pasakaan nila kini og kasong murder. (BANAT NEWS)
- Latest
