33-anyos nalatayan sa dump truck

CEBU, Philippines - Wala mahitsura ang lawas sa usa ka 33-anyos nga lalaki human maligsi og usa ka cargo truck didto sa national highway sa Barangay Perrelos, Carcar City kagahapon sa buntag.

Patay nang miabot sa tambalanan si Michael Shane Micaros, taga Barangay Poblacion, Compostela, nga sakay sa iyang Kawasaki Rouser motorcycle (2675 IP) nga paingon unta sa Carcar City gikan sa Cebu City.

Matud ni traffic officer Eduardo Bagol nga nagsunod si Micaros sa Mitsubishi cargo truck nga adunay karga nga semento paingon sa Sibonga gikan sa San Fernando. Ang truck gimaneho ni Claudio Laroa, 37, taga Barangay Papan, Sibonga.

Matud pa nga mi-overtake si Micaros sa cargo truck apan wala niya mabantayi ang nagpadulong nga ambulansya sa Ronda nga gimaneho ni Rogelio Vergara, 63, taga Barangay Casayahon, Ronda. Adunay sakay nga pasyente ang maong ambulansiya nga paingon sa Cebu City. Unang naigo si Micaros sa ambulansiya ug nalatayan sa nagsunod nga cargo truck.

Si Laroa ug Vergara natanggong na karon sa Carcar City police stockade ug pasakaan kini og kasong reckless imprudence resulting in homicide and damage to property. (/EIM) (BANAT NEWS)