CEBU, Philippines - Nagpakitabang sa mga sakop sa media ang kapin sa 40 ka contractual employees sa Bureau of Land sa Department of Environment and Natural Resources (DENR)-7 tungod kay kapin sa usa ka bulan na silang wala makadawat sa ilang sweldo.
Ang mga mireklamo nga mihangyo nga dili lang hinganlan mibutyag nga sukad pa niadtong bulan sa Enero ning tuiga wala pa g’yud sila makadawat sa ilang suhulan.
Matud pa nga ang rason nga gihatag kanila sa DENR mao nga nalangay ang pag-andam sa renewal sa ilang kontrata.
Ang uban kanila kinse ka tuig nang contractual employees sa DENR, apan sa miaging buwan ra g’yud nila nasinati ang maong kalangan sa sweldo.
Sa iyang bahin, si Regional Technical Director Wilfredo Lee sa Bureau of Lands sa DENR-7 miklaro nga adunay kwarta ang ilang buhatan alang sa sweldo sa nahisgutang mga kawani nga ubos sa programa sa CARP.
Matud ni Lee nga nalangan lang kini tungod sa kakulian sa pagpa-cash sa tseke apan gipaabot nga sunod semana ang sweldo ma-release na. (/EIM)(BANAT NEWS)