CEBU, Philippines - Dili interesado nga mopasaka og kaso ang pamilya sa mga biktima sa nadisgrasya nga van-for-hire sa Argao sa miaging adlaw.
Si Lorna Miñao nga nahinabi sa Banat News miingon nga gitabangan sila sa Norphil Foundation sa pag-abag sa ilang galastohan sa pagpatambal sa ilang mga gihambing balatian maong dili sab makatarunganon nga ila pa silang ikiha.
Sumala pa ni Miñao nga nakaangkon siya og samad sa iyang kilay ug gitahi na kini apan gipagawas ra siya sa tambalanan tungod kay gamay ra man ang iyang kadaot nga naangkon. Lakip sa nakagawas gahapon mao ang anak niya nga si Ryan, 12, nga nakaangkon og samad sa iyang ulo ug bun-og sa iyang tuong tiil.
Sumala pa sa inahan nga dihang nabangga ang ilang gisakyan iyang gigakos ang iyang anak ug sunod na lang niyang nabantayan nga napasok na kini sa lingkoranan sa van.
Misangpit siya og pakitabang apan walay mitabang kanila apan pipila ka minuto gibunlot na sa mga tawo ang iyang anak ilawom sa lingkoranan. Si Maria Corazon Mendez, igsuon sa biktima nga si Arieta Caracol, 41, miingon nga dili usab sila interesado mopasaka og kaso ni bisan kinsa tungod kay maayo ra man ang pagtagad sa Norphil Foundation sa ilang kahimtang.
Sumala pa ni Mendez nga upat sa ilang pamilya ang nadisgrasya ug usa kanila ang nakalas nga si Diether Caracol, 9, tinun-an sa Grade 2.
Miingon si Mendez nga wala siya nagasto sa pagpa-ospital sa iyang igsuon ug sa iyang duha ka mga pag-umangkon nga sila si Alison, 3 ug si Luis, 6.
Matud pa ni Mendez nga dunay representative sa Norphil nga miatiman gyud nila samtang naa sila sulod sa Vicente Sotto Memorial Medical Center. Ug ang Norphil maoy naghatag kanila sa pagkaon ug sa mga tambal nga gikinahanglan sa mga pasyenti. (/EIM) (BANAT NEWS)