CEBU, Philippines - Gipusil ug gipatay ang usa ka pizza delivery boy didto sa Barangay Mojon, Talisay samtang nagpaingon kini sa iyang trabahoan kagahapon sa buntag. Ang biktima mao si Mario Cañeda, 34, taga Sitio Candaya, Barangay Mohon. Nakaangkon ang biktima og pinusilan sa wala’ng bahin sa iyang ulo nga maoy hinungdan sa iyang kamatayon.
Si SPO1 Mikie Espina nga usa sa mga miresponde sa hitabo mibutyag nga sa wala pa mahitabo ang pagpamusil, si Cañeda nagsakay kini sa iyang motorsiklo paingon nang mo-report sa iyang trabaho dihang duha ka wala mailhing lalaki nga nagsakay usab og motorsiklo misunod kaniya.
Matud ni Espina nga ang nag-angkas maoy mipusil kang Cañeda dayon paspas nga miikyas pahilayo. Wala pa masayud ang kapolisan unsay motibo sa pagpamusil.
Ang asawa ni Cañeda nagkanayon nga wala siya’y nahinumduman nga dunay nakaaway ang iyang bana.
Sa laing bahin, si Mohon Barangay Captain Vicente Bas nagkanayon nga si Cañeda walay mga dautang record diha sa ilang barangay nga nalambigit og kagubot gawas lang niadtong nag-turn over kini kaniya og usa ka motorsiklo.
Matud ni Bas nga ang maong motorsiklo giingong gibilin kang Cañeda ug gipangita sa mga polis.
Dugang ni Bas nga gitugyan usab niya ngadto sa mga polis ang nahisgutang motorsiklo. (BANAT NEWS)