CEBU, Philippines - Napanglantawan sa kadagkoan sa National Food Authority (NFA) nga hayan mosaka ang prisyo sa bugas humay dinhi sa Sugbo tungod sa pagnihit sa suplay.
Si Lucy Rosales, tigpamaba sa NFA, miingon nga sagad sa unang duha ka bulan sa tuig magnihit g’yud ang suplay sa bugas humay nga gikan ra dinhi sa atong nasud kay ang ting-ani karon pa man’g sunod buwan.
Apan matud ni Rosales nga ang katawhan dili angay nga mabalaka kay ang NFA daghan man og suplay nga bugas nga imported gikan sa laing nasud ug anaa karon sa ilang bodega.
Mga tigbaligya og bugas nakabantay nga misaka og P20 ang matag sako sa bugas humay nga nagpasabot nga hayan mosaka ‘sab og 50 sentimos ang mata’g kilo sa bugas. (BANAT NEWS)