CEBU, Philippines - Nasakmit sa kapolisan ang lima ka pakete nga shabu gikan sa usa ka tawo nga ilang nadakpan sa buy bust operation didto sa Barangay Tayud, Consolacion alas 3 pasado ang takna kagahapon sa hapon.
Ang nadakpan mao si Ritchie Ibale, 26, ulitawo nga taga Sitio Baha-Baha, Barangay Tayud kinsa gibalhog sa bilanggoan.
Si PO3 Arthur Oriate miingon nga nadawat nila ang report kabahin sa illegal nga kalihokan ni Ibale nga maoy hinungdan nga ang team nila ni PO3 Edmund Melendres ug mga kauban naniid dayon sa iyang kalihukan.
Human sa pipila ka adlaw nga pagpaniid ilang gipahigayon ni PO3 Melendres ang buy bust operation ug ilang gigamit nga police decoy ang usa sa ilang mga kauban.
Dihang gitunol ni Ibale ang usa ka paketeng shabu ngadto sa police decoy, gidakop dayon sa kapolisan ang suspek ug dihang girekisa ang mga bulsa nakuha ang laing upat pa ka paketeng shabu.
Matud ni PO3 Oriate nga giandam na nila ang tukma’ng kaso nga ipasaka batok ni Ibale. (BANAT NEWS)