CEBU, Philippines - Andam moatubang sa bisan unsang reklamo ang kapolisan kung tinguhaon sa pamilya sa gipasanginlang kawatan nga si Ferdinand Pasaan kinsa napatay human gikatahong nakigpinusilay sa mga polis sa miaging adlaw.
Matud pa ni Chief Insp. Noli Cernio, hepe sa Theft and Robbery Section sa Cebu City Police Office nga iya nang gimandoan ang deputy chief sa TRS nga si SPO4 Jaime Toring nga ipailawom sa ballistics examination ang revolver nga nakuha gikan sa lawas sa suspek.
Sumala pa ni Cernio nga iya na usab nga gi-request nga ipaubos sa paraffin test ang duha ka kamot ni Pasaan aron mahibaw-an kun nakapabuto ba gyud kini sa iyang armas.
Sumala pa nga nakakuha og duha ka basiyo sa bala ang mga sakop sa Crime Scene Investigation Unit. Si Pasaan napatay sa sakop sa Special Weapons and Tactics (SWAT) human nga mipabuto siya sa mga sakop sa TRS nga migukod kanila diha sa dalan Rahman, barangay Zapatera.
Milayat sa taytayan ang grupo ni Pasaan apan siya ray napusilan ug nakaikyas ang iyang mga kauban.
Matud ni Cernio nga modus sa maong grupo nga mangawat sa mga balay sa inig ka hapon. Gidudahan nga nalambigit usab sila sa mga pagpanulis sa jeep. Gipangita pa karon ang mga kauban ni Pasaan. (BANAT NEWS)