Mga mag-uuma pautangon sa siyudad
CEBU, Philippines - Motanyag ang kagamhanan sa siyudad sa Sugbo og zero interest loan program sa mga mag-uuma sa siyudad pinaagi sa Cebu City Agriculture Department aron mas makaginansiya sila sa ilang tanom ug kahayupan.
Kini maoy gipahibalo ni Joey Baclayon, Cebu City Agriculturist, human siya nakadawat og report nga adunay mga mag-uuma nga nagkautang-utang.
“Dagko kaayong interest. Pabut-on lang pud like sa presyo, pila ilang kuhaon. So why not ang city mo initiate og ingon ana di ba? Di pa mabug-atan ang mga farmers,†matud pa ni Baclayon.
Dugang ni Baclayon ilang paningkamutan nga sugdan ang maong programa sa ikaduhang kwarter niining tuiga gamit ang giandam nga P5 milyones nga budget gikan sa siyudad.
Si Baclayon miingon nga kada hugpong sa mga mag-uuma mamahimong makautang sa kutob sa P100, 000 ug pabayran kini sulod sa usa ka tuig.
Ang mga lider na sa mga kahugpongan sa mag-uuma maoy bahala sa pag-apod apod niini sa ilang sakop.
Ang Cebu City Farmers Federation adunay 56 ka mga primary associations nga gilangkuban sa 30 hangtod 150 ka mga mag-uuma. (BANAT NEWS)
- Latest
