CEBU, Philippines - Napusilan patay ang usa ka lalaki nga gituohang kawatan kay giingong misukol sa mga polis nga migukod kaniya human nasigpatan kauban sa laing tulo ka lalaki nga nagbitbit og speaker sa Rahman Street, Barangay Zapatera, dakbayan sa Sugbo pasado ala 1:00 kagahapon.
Ang namatay naila nga si Ferdinand Pasahan, 21, taga sitio Camansi, barangay Lorega-San Miguel.
Matud ni SPO4 Jayme Toring, chief investigator sa Theft and Robbery Section (TRS) sa Cebu City Police Office nga mitubag sila sa alarma nga dunay kawat nga nahitabo sa Rahman Street.
Nasigpatan nila ang upat ka lalaki nga kadudahan ang linihokan ug ang usa niini nagbitbit og itom nga garbage bag. Dihang ilang gisita ang upat naglumbaanay sila og panagan maong gigukod sila sa mga polis apan gikatahong gipabuthan sila sa grupo maong nangayo og backup ang taga TRS sa Special Weapons and Tactics (SWAT).
Usa ka bata ang mitug-an nga nakadungog siya og duha ka buto sa armas ug taud-taud nakit-an niya nga dunay upat ka lalaki nga miambak sa taytayan sa Rahman Street eskena Mango Avenue.
Matud sa maong saksi nga ang usa ka lalaki midagan sa sapa padulong Carreta apan ang laing duha midagan padulong sa pikas nga bahin.
Si Pasahan naigo sa iyang ulo ug nahayang sa sapa human mapusili sa usa ka sakop sa SWAT.
Gisuwayan pagpangita sa kapolisan ang laing tulo ka lalaki apan wala na nila kini makit-i pa.
Ang inahan sa namatay nga si Estrella Pasahan miingon nga naniudto ang iyang anak sa ilang balay ug gitawag kini sa iyang mga barkada.
Nakugang na lang siya nga dunay mipahibalo nga napatay sa mga polis ang iyang anak. “Gabaan ra ang nagpusil patay sa akong anak tungod kay naay Diyos nga nagtan-aw,†maoy pangaliya sa nagbangotan nga inahan.
Ang kapolisan mipasangil nga duna sila’y nakuhang usa ka 22 nga Magnum revolver gikan kang Pasahan. Lakip sa na-recover mao ang duha ka dagkong speakers nga gisulod sa itom nga garbage bag. (/EIM)(BANAT NEWS)