CEBU, Philippines - Abi kay wala man g’yud misugot ang Cebu City Hall sa hangyo nga buksan pagbalik ang Las Vegas KTV nga gisirad-an tungod sa pagpasalida’g law-ay, may miaplay og permit nga himoon na lang kining kan-anan.
Apan ang aplikasyon nga giduso didto sa City Hall wala pa’y kasiguroan kun aprobahan ba ug hatagan og permiso kay gitun-an pa kini sa mga sakop sa Cebu City Anti-indecency Board (CAIB).
Ang CAIB maoy mirekomendar nga sirad-an ang Las Vegas KTV bar kay bisan giunsa nila og hangyo nga mohunong pagpasalida og hilas nga talan-awon wala gayud kini mopatoo.
Ang abogado sa Las Vegas KTV bar nga si Inocencio Dela Cerna mibutyag nga gibaligya na sa iyang kliyente ang luna kay wala man misugot ang City Hall nga mobalik sila og operate bisan sa pasalig nga dili na sila mopasundayag og law-ay nga talan-awon.
Matud ni CAIB chief Lucelle Mercado nga adunay miaplay og permit aron ang mao nga luna nga gigamit kaniadto sa Las Vegas himoon na lang nga restaurant.
Ang miaplay og permit sayo pa misugyot nga lainon na og ngalan ang balay-patigayon apan usa gihapon kini ka resto bar. Ang ordinansa naglatid nga kun ang balay patigayon mapasirad-an dili kini mabuksan sulod sa usa ka tuig nga susama ra gihapon ang negosyo.
Si Mercado miawhag sa bag-ong tag-iya nga kinahanglan ang hulagway sa kanhi bar mamahimong hulagway gyud sa usa ka kan-anan. (BANAT NEWS)