Rama ug Tommy nagkahiusa pagdepensa sa SRP

CEBU, Philippines - Pareho og baruganan sila si Mayor Michael Rama ug kanhi kongresista Tomas R. Osmeña nga dili illegal ang pagbaligya sa dakbayan sa Sugbo sa kayutaan sa South Road Properties (SRP) sigun sa gipasiatab sa usa ka kanhi magbabalaud.

Ang kanhi kongresista kang kansang pamilya kritiko ni Osmeña sa politika miingon nga illegal ang gihimo sa dakbayan nga pagbaligya sa kayutaan sa SRP kay wala kini pagtugot sa kongreso.

Gihulagway ni Osmeña nga wala g’yuy basihanan ang pamahayag sa kanhi kongresista kang kansang ngalan gipugngan lang kay dili siya gusto nga magpaila.

Ang argumento nila ni Osmeña ug Rama ingon man si Vice Mayor Edgardo Labella, nga miisyu na og Proclamation 843 ang Malacañang atol sa termino ni kanhi Presidente Arroyo nga ang dakbayan gayud maoy tag-iya sa tibuok SRP.

Matud ni Labella nga ang proklamasyon nga giisyu sa Malacañang nagtataw nga ang kayutaan sa SRP mahimong kapuy-an ug ikabaligya sa dakbayan ngadto sa mga interesado nga moangkon.

Gani ang Commission on Audit (COA) mipagawas na og hukom kaniadto pa’ng 2009 nga nag-ila sa katungod sa dakbayan sa Sugbo nga makabaligya sa kayutaan sa SRP.

Si Labella milantugi nga sayop ang baruganan sa kanhi kongresista sanglit mahimo lang kini nga illegal kun wala pa’y presidential proclamation nga giisyu ang Malacañang.

Ang susama nga argumento gituki na sa hukmanan dinhi sa Sugbo kaniadto dihang si Tinago Barangay Kapitan Joel Garganera mikwestyon usab sa pagbaligya og kayutaan sa SRP.

Ang Regional Trial Court (RTC) mibasura sa kaso nga gisang-at ni Garganera nga nag-awhag unta nga pugngan ang City Hall sa pagbaligya sa kayutaan sa SRP.

Gisuportahan sa Court of Appeals ang hukom sa RTC nga nagbasura sa awhag ni Kapitan Garganera nga pugngan ang kagamhanan sa dakbayan sa Sugbo pagbaligya sa kayutaan sa SRP.

Matud ni Osmeña nga ang kanhi kongresista nga mikwestyon sa pagbaligya sa dakbayan sa kabahin sa SRP nasuya ra g’yud nga nakaangkon niining maong katigayonan ang dakbayan. 

Si Mayor Rama sa iyang bahin miingon nga lig-on ang gihuptan nila nga titulo sa yuta nga nagmatuod nga ang dakbayan sa Sugbo maoy tag-iya sa tibuok SRP.

Gihulagway ni Osmeña nga ang pagkwestyon sa kanhi kongresista, ilabi na nga mihangyo kini nga dili magpaila, klaro kaayo nga usa lang ka paningkamot nga dauton ang dakbayan sa Sugbo.

Si Osmeña mitataw nga dili pa karon maayo nga ibaligya pagpadayon ang kayutaan sa SRP kay mas labing nindot nga unya na kun mahuman ang higante nga mall nga gitukod sa SM ug ang condominium projects sa Filinvest Land Inc.  (BANAT NEWS)