CEBU, Philippines - Ipahigayon karong adlawa ang ikatulong tuig sa Silhig Festival diha sa barangay Paknaan sa dakbayan sa Mandaue, dunay indigay tali sa pito ka mga contingents gikan sa naglainlaing sitio sa maong barangay.
Ang Silhig Festival kabahin sa mga kalihokan sa tinuig nga pangilin ni Senyor Santo Niño ug gihimo nilang kalihokan aron pagpaila sa nag-una nilang produkto nga mao ang silhig lanot gikan sa buli.
Ang barangay kapitan sa Paknaan nga si Malaquias Soco nga nahinabi sa Banat News miingon nga ang Silhig festival ila nang nasabutan nga himuon sa matag ikaduhang Domingo sa bulan sa Pebrero.
Matud pa ni Soco nga ang dance steps sa mga contingents ibase sa kun giunsa sa pagbuhat ang silhig nga lanot.
Dugang pa niya nga dako na ang kalamboan sa nahisgotang festival kun itandi sa nangaging katuigan.
Matud niya nga ang maong indigay gihimo usab nilang halad ngadto sa Balaang Bata mao nga ilaha kining himuon matag kapistahan sa ilang barangay. (BANAT NEWS)