Upat girakrakan sud sa sakyanan
CEBU, Philippines - Nakalingkawas sa kamatayon ang upat ka tawo sa pagpangambus sa duha ka armadong lalaki nga nagsakay og motorsiklo alas- 2 pasado ang takna kagahapon sa hapon sa sitio Aggis, barangay Poblacion, lungsod sa Compostela.
Ang mga biktima mao sila si William Solano Ligotan, 53, Mark Christian Ligotan, 24, Rolito Bensig, 48, ug Rey Ligotan, pulos nagpuyo sa barangay Cambayog sa lungsod sa Compostela.
Si SPO3 Pedro Enriquez sa kapolisan sa nahisgutang lungsod nga nahinabi sa Banat News miingon nga nagsakay og sakyanan nga gimaneho ni William ang mga biktima dihang pag-abot nila sa nahitaboan kalit silang gisikitan sa duha ka wa mailhing lalaking nagmotor.
Ang duha pulos nagsul-ob og closed -type helmet ug ang backrider kalit nga namusil kanila.
Matud pa ni Enriquez nga human sa maong pagpamusil mipabulhot sa pagpadagan palayo ang mga gikatahapan paingon sa dakbayan sa Danao.
Si Enriquez miingon nga natusak sa mga bala ang sakyanan sa mga biktima apan suwerte nga bisan usa walay naigo kanila.
Nakuha sa sakyanan ang mga niungot nga slugs nga gituohang gikan sa bala sa kalibre 45 nga pistol. Wala pay ideya ang kapolisan sa motibo sa maong pagpamusil. (BANAT NEWS)
- Latest
