Bus pasaheroan magnihit karong tuiga

CEBU, Philippines - Mipasidaan ang mga bus ug mini bus operators dinhi sa Sugbo nga magkulang gyud unya ang mga bus pasaheroan sa lalawigan karong tuiga.

Kini kun dili patalinghugan sa Land Transportation Franchising and Regulatory Board kon LTFRB-7 ang ilang petisyon nga nangayo og lima ka tuig nga moratorium sa pagpatuman sa lagda nga dili na padaganon ang mga bus ug minibuses o mga jeepneys nga miabot na og 15 ka tuig pataas.

Ang pangulo sa Cebu South Mini-Bus Operators Association miingon  Jolito Flores nga sugod karong bulan sa Oktubre magnihit na unya ang mga bus nga magdagan paingon sa  kalungsuran sa probinsiya ug balik dinhi sa syudad sa Sugbo.

Kini tungod kay 30 hangtud sa 40 porsiyento sa mga buses sa ilang grupo ang wala na hatagi og bag-ong prangkisa sa LTFRB tungod kay niabot na kini og 15 ka tuig.

Matud pa ni Flores nga ang mga bus operators maglisod pa karon sa pagpalit og bag-ong mga buses sanglit moabot og P4 milyones ngadto sa P5 milyones ang matag usa.

Iyang giklaro nga kun magmagahi ang LTFRB sa  pagtagad sa ilang hangyo posibleng usa na lamang ka bus company ang magdagan nga mao ang Villacars Transport Inc. ang nagdumala sa mga Ceres Bus.

Dugang pa ni Flores nga kun mahitabo kini ma-monopoliya na sa usa ka bus company ang mga buses nga magdagan sa lalawigan ug  dili kapugngan ang pagsaka sa pletihan kay wala na may kompetensiya niini. (/EIM)(BANAT NEWS)