CEBU, Philippines - Gisubhan kagahapon sa buntag ang bag-ong Carcar City Jail nga nahimutang diha sa Sitio Takdog, barangay Poblacion III nga usa sa mga bukirang barangay sa siyudad.
Ang Jail Warden sa maong bilanggoan nga si Inspector Roger Daligdig mibutyag nga ang maong tulo ka ektaryang city jail dunay walo ka dorm ug masudlan og 500 ngadto sa 600 ka priso.
Matud ni Daligdig nga ang building nga mibarog karon phase I pa kini sa kinatibuk-ang proyekto tungod kay duna pay tukoron nga basketball court ug lugar kung asa ipahigayon unya ang livelihood program sa mga piniriso.
Karong Lunes gikatakdang balhinon na sa bag-ong prisohan ang mga inmates gikan sa karaang city jail diha ubos sa city hall nga limitado lang unta sa 30 ka tawo.
Ang Carcar City Jail aduna karoy 136 ka inmates, walo niini mga babaye, 70 porsyento kanila nalambigit sa kaso sa ginadiling drugas. Si Mayor Nicepuro Apura sa iyang bahin, mibutyag nga P7 milyones ang budget sa gitukod nga city jail nga gisugdan og tukod sa milabay’ng tuig.
Kagahapon, emosyonal si Apura sa iyang pagpamulong kay usa sa mopuyo sa maong pasilidad ang suspek sa pagpatay sa iyang anak.
Si Kongresista Gerald Anthony “Samsam†Gullas, Jr. sa unang distrito ang migahin og P8 milyones alang sa pagsemento sa karsada paingon sa city jail.
Ang regional director sa Bureau of Jail Management and Penology (BJMP) sa rehiyon-7, Chief Supt. Diogracias Tapayan, nga usa sa pinasidunggang dinapit miingon nga ang rehiyon duna la’y 34 ka prisohan nga gidumala sa BJMP.
Matud ni Tapayan nga sagad niini “over populated†kay ang tukma usa lang unta ka priso ang ibutang sa matag tulo ka metro kwadrado.
Sumala pa ni Tapayan nga nagkinahanglan gyud sila og tabang sa lokal nga kagamhanan alang sa kauswagan sa city jail diha sa ilang lugar. (/EIM)(BANAT NEWS)