Frontline units na lang makapa-blotter

CEBU, Philippines - Mipakanaog og mando ang hepe sa kapolisan sa nasud kalabot na sa bag-ong guidelines sa pag-blotter human sa nahitabo sa actor comedian nga si Vhong Navarro didto sa kaulohan.

Si Senior Supt. Armando Radoc, hepe sa Regional Investigation and Detective Management Branch (RIDMB) miingon nga dili na pwedeng adto magpa-blotter ang usa ka biktima sa laing estasyon sa kapolisan gawas sa estasyon diin ang krimen nahitabo.

Sumala pa ni Radoc nga pananglitan ang krimen nahitabo sa dakbayan sa Sugbo dili mahimo nga adto sa dakbayan sa Talisay magpa-blotter ang biktima.

Ug kun ugaling duna gyuy moinsister nga magpa-blotter kinahanglan nga i-refer kini balik ngadto sa police station diin nasakop ang lugar nga nahitaboan sa krimen.           

Ang hepe sa City Intelligence Branch Chief Insp. Romeo Santander miklaro hinuon nga mamahimo gihapong mo-request ang mga reklamante nga ang CIB ang mo-imbestigar sa ilang mga kaso.

Apan miingon si Santander nga joint investigation na ang buhaton sanglit dili na man sila pwede nga maoy mangunay mismo sa imbestigasyon.

Ang kamandoan sa chief PNP nga si Director General Alan Purisima nagdili usab sa mga regional base offices sa pagtinir og blotter.

Si Vhong Navarro gidala sa Southern Police District ug didto gipa-blotter ang alegasyong pagsuway niya og lugos sa modelo nga si Deniece Cornejo, matud pa sa bag-ong direktiba adto unta kini gihimo sa Taguig City kay didto man nahitabo ang reklamo. (BANAT NEWS)