CEBU, Philippines - Nadakpan sa kapolisan ang usa ka gituohang drug pusher lakip na sa iyang hinigugma atol sa buy bust operation didto sa Barangay Taloot, Argao kaniadtong Miyerkules sa gabii.
Ang hepe sa kapolisan sa Argao nga si Inspector Alejandro Batobalonos miila sa mga dinakpan nga sila si Rolando Resurecion, 30, taga Barangay Guiwanon ug si Angel Batad, 28, taga Simala, Sibonga.
Ang duha ka suspek didto madakpi sulod sa usa ka pension house ug nakuhaan sila og 37 ka paketeng shabu nga kantidad og P17 mil.
Nakuhaan pa gayud sila og kalibre .45 nga pistola nga may walo ka bala ug pito ka basiyo ug laing duha ka bala sa .9 mm nga pistola.
Apil sa nakuha mao ang gamay’ng timbangan, mga plastic nga gamiton alang sa pag-repack sa shabu, lighter, laptop ug cellphone, resibo sa money transfer usa ka bag ug P46 mil nga gituohang halin sa shabu.
Matud pa nga si Batad gayud mismo ang mitunol ngadto sa police poseur buyer sa usa ka paketeng shabu bugti sa P1,500. Nadakpan ‘sab sa kapolisan sa Talisay ang 27-anyos nga si Jomar Pantallana, taga Barangay Tangke, Talisay human masakmiti og unom ka pakete nga shabu.
Ang suspetsado giingon nga abtik kaayo nga dunay giitsa dihang nangabot ang mga polis nga mironda unta sa usa ka sugalan. Dihang gitan-aw sa kapolisan ang giitsa ni Pantallana adunay mga shabu. (BANAT NEWS)