DUMAGUETE CITY, Philippines – Duha ang patay sa tulo ka pagpamusil sa nakalabay’ng semana bisan sa panawagan sa nagkadaiyang sektor sa kapolisan nga hingusgan ang kampanya batok krimen. Sa Bayawan City, usa ka police informant ang gipusil patay sa wala pa mailhing mamumuno. Ang biktima giilang si June Mark Bucad, 28, kinsa nanihapon nianang tungora dihang kalit kining gipaulanan og bala sa mga lalaking sakay og motorsiklo. Patay na siya pag-abot sa Bayawan District Hospital.
Samtang sa Guihulngan City, usa ka James Cuevas, 54, ang gipusil patay sa atubangang bahin sa ilang balay sa Brgy. Malusay. Duha ka lalaking luwan og motorsiklo ang gitumbok nga mipusil kaniya, wala na kini matabang pa sa mga doktor sa Guihulngan District Hospital, samtang gisubay pa ang motibo sa maong pagpatay. Laing pagpamusil usab ang nahitabo sa Brgy. Baras sa lungsod sa Mabinay diin usa ka Perlita Asturias, 39, ang naangol human gipusil samtang nangihi sa katubhan.
Matud pa naigo sa iyang kinatawo ang ginang ug daling gidala sa iyang bana ngadto sa tambalanan. Wa pa matino sa kapolisan kung si kinsa ang mipusil sa biktima.(Gikan sa The Freeman/EIM) (BANAT NEWS)