CEBU, Philippines - Mipahigayon ang Department of Health - 7 og pagpamakuna og pagpuhag ug pagpatay sa mga lamok nga nagdala ug sakit didto sa lungsod sa Loon, Bohol diin miigo sa niaging tuig ang kusog nga linog.
Matud sa hepe sa Regional Epidemiology and Surveillance Unit (RESU) Rennan Cimafranca, unom sa dose ka samples nga ilang gi-eksamin ang positibo sa sakit Chikungunya, usa ka matang sa sakit nga susama sa ordinaryong tipdas apan dunay uban nga pagpanakit sa lutahan, samtang usa nga positibo sa tipdas o German measles.
"Two weeks ago, na confirm nato nga Chikungunya gyud. Last week, nag mop up vaccination ‘ta sa Loon then integrated vector management," matud pang Cimafranca.
Duna pay laing tulo ka kaso nga gidudahang kaso gihapon sa Chikungunya ang ilang gi-monitor sa mao gihapong lungsod.
Lakip sa mga barangay nga ilang giadto mao ang Poblacion, Catagbacan Sur, Catagbacan Norte, Catagbacan Handig, Catumocad ug Pondol.
Gibakunahan batok Measles Mumps and Rubella (MMR) kadtong mga bata nag-edad usa ka tuig ngadto na sa 15-anyos. Nag-spray sab ang RESU og Lambda Cyhalothrin nga kemikal nga makapatay sa lamok nga Aedis Aegypti nga maoy nagdala sa sakit nga Chikungunya ug dengue.
Gibutangan usab nila sa susamang kemikal ang mga mosketiro ug kurtina sa maong lugar aron sa pag-abog sa mga lamok.(/EIM)(BANAT NEWS)