CEBU, Philippines - Duha ka tawo, apil ang usa ka polis, gidakop sa kapolisan kay sila gitumbok nga maoy mipusil-patay sa usa ka lalaki nga ilang gikalalis didto sa barangay Antipolo, Medellin sa miaging Sabado sa gabii.
Ang mga suspek giila nga sila si PO2 Edwin Tumangan, 38, nadestino sa headquarters sa Maritime Police Unit sa Barangay Pusok, Lapu-Lapu ug si Mark Ben Anthony Monteron, 26, taga Gorordo Avenue, dakbayan sa Sugbo.
Sila ang gikatahapan nga mipatay ni Linley Yuan Saplad, 62, molupyo sa barangay Antipolo, Medellin.
Base sa report nga miabot sa Cebu Provincial Police Office nga samtang nag-estorya ang biktima ug ang iyang ig-agaw nga si Bebie Saplad kalit lang miabot si Monteron ug mipusil sa biktima sa pipila ka higayon.
Ang samaran nga biktima gidala sa ospital sa dakbayan sa Bogo apan gideklarar nga patay na pag-abot didto.
Sigun sa imbestigasyon nga daling midagan ang suspetsado padulong sa motor nga gimaneho ni Tumangan ug mipasirit kini og pagpadagan paingon sa Sitio Sta. Cruz, Barangay Antipolo.
Ang kapolisan mihimo og follow-up operation didto sa dapit nahitaboan ug ilang nadakpan ang duha ka suspek sa balay ni Monteron pinaagi sa pagtabang ni Mayor Ricardo Ramirez.
Nakuha gikan kang Tumangan ang usa ka 9 mm nga pistola, usa ka magazine nga may 14 ka bala, usa ka Ramstar nga motor, usa ka shoulder holster bag nga camouflage, ID sa deputized agent sa LTO nga si Edwin Tumangan ug ang PNP ID sa polis. Ang duha ka suspek natanggong karon Medellin Police Station. (/RUB)(BANAT NEWS)