CEBU, Philippines - Mga topnotcher sa Talisay City College (TCC) nga nagtudlo na karon sa maong eskuylahan, gitinguhang himuong permanent teachers.
Sumala pa ni City Councilor Dennis Basillote, tsirman sa committee on education sa konseho sa Talisay nga dili sayon ang gihatag nga dungog ngadto sa maong tunghaan ug sa siyudad sa maong mga magtutudlo dihang mipasar ug mihawod sila sa Licensure Examination for Teachers (LET).
Niadtong milabay’ng Martes giaprobahan sa konseho sa Talisay ang resolusyon ni Basillote nga nag-awhag sa Department of Education (DepEd) nga hatagan og regular teaching position ang maong mga top notchers nga sila si Aiza Pansacala, Zaldy Villarias, Mary Kaye Misa, Diana Rose Zamoras, Junnalie Brago ug Angielo Pahamutang.
Si Pansacala nahimutang kini sa rank No.3 sa LET sa school year 2008-2009, samtang si Villarias nahimutang sa rank No. 10 sa LET sa school year 2009-2010, sa school year 2010-2011 si Misa nahimutang sa rank No.8, rank No. 7 sa school year 2011-2012 si Zamoras, gisundan ni Brago ug Pahamutang sa school year 2012-2013 kinsa parehong nahimutang sa rank No.10. Si Basillote nagkanayon nga ang TCC kanunay kining adunay mga top-notchers.
Niadtong tuig 2012 nag-una ang TCC sa labing daghang board passers nga nakakuha og 87.65 porsiyento nga passing percentage o sa 81 kabuok nga mikuha sa LET, 71 niini ang nakapasar.
Matud ni Basillote nga ang Professional Regulations Commission (PRC) nagkanayon nga ang TCC usa sa top-performing school sa Elementary Education kay nakakuha kini og 90.24 passing percentage niadtong buwan sa Marso, 2013 diin sa 81 ka mga mikuha og teacher’s board examination 74 ang mipasar.
Gipasabot ni Basillote nga ang paghatag og garbo sa mga top-notcher ngadto sa siyudad dili sayon ug angayan lang nga bugtian usab sila pinaagi sa paghatag kanila og mga permanenteng posisyon sa ilang pagtudlo. (/EIM)(BANAT NEWS)