CEBU, Philippines - Gitinguha ni 6th District Board Member Thadeo Ouano sa kagamhanan sa lalawigan sa Sugbo ang pagpasiugda og multilingual training course sa kalungsoran aron mamahimong alternatibong kapanginabuhian isip mga lokal nga tourist guides.
Si Ouano sa iyang resolusyon miingon nga ang tour guides maoy giya sa mga langyaw nga mga turista nga mobista sa kalungsoran ug mga dakbayan sa lalawigan.
Busa mahinungdanon kaayo nga duna gyuy makamaong makig-estorya sa mga turista gikan sa lokalidad nga nasuhito sa mga suroyanan.
Ang mga buot mosalmot sa multilingual training course tudloan sa mga pinulongang Englis, Hapon, Koryano, Intsik , Indian ug uban pa.
Matud pa ni Ouano nga kinahanglang makat-on ang mga tourist guides sa mga kultura, estorya, ug kasaysayan sa mga dapit nga suroyanan ug maesplikar kini gamit ang nakat-onang pinulongan sa turistang ilang kauban.
Ang lokal nga turismo dako kaayo og ikatabang alang sa paghatag og trabaho sa mga residente niining mga dapit nga nahimo karong mga tourist spots. (/EIM)(BANAT NEWS)