CEBU, Philippines - Dul-an 200 ka mga inmates ang yanong nanggawas sa main gate sa compound sa Leyte Provincial Jail sa Palo kagahapon sa kaadlawon sumala pa sa ilang warden nga si Merle Bertulfo.
Matud pa ni Bertulfo ang mga inmates nangiskapo dihang gi-serve ang ilang mga kape. Matud pa kauban nila ang ilang mga asawa, mga anak ug mga kabanay padung sa highway. Misuway unta og warning shots ang mga jailguards apan wala kini panumbalinga sa mga inmates. Miresponde dayon ang mga sakop sa Police Regional Office-8 ug mitabang sa pagsikop sa mga nangeskapo, apan 147 lang ang ilang nadakpan ug gipangita pa ang 35. Si Bertulfo mibutyag sa The Freeman (igsuong pamantalaan sa Banat News) nga ang rason sa ilang pag-eskapo mao ang kakulang sa pagkaon nga dugay na kaayo nilang gireklamo ug ang kalangay sa paghusay sa ilang tagsa-tagsa ka mga kaso diha sa mga hukmanan. Gituohang ang mga dokumento sa ilang mga kaso naapil sa nangahanaw atol sa bagyong Yolanda nga nakaguba usab sa maong prisohan.
Usa ka kasaligang tinubdan diha sa maong bilanggoan ang mibutyag nga dili gyud intensyon sa mga inmates nga moeskapo kondili aron lang makakuha og atensyon sa mga awtoridad kabahin sa ilang mga yangungo. Matud pa nga dunay mga inmates nga gagmay lang og kaso sama sa kawat ang napriso na og tulo ka tuig apan wala pay hukom sa ilang mga kaso, matud pa sa tinubdan.
Si Bertulfo mipasalig sa mga nadakpan pagbalik nga mga priso nga iyang ipaabot sa mga hingtungdang ahensya ang ilang mga reklamo. Sa mao gihapong prisohan nangeskapo ang mga priso niadtong gihapak sa bagyong Yolanda ang maong probinsya sa miaging tuig. Si Senior Supt. Jose Macanas, director sa Ormoc City Police, mikompirmar sa maong jailbreak ug gimando na niya ang pagbutang og mga checkpoints samtang gipangita pa ang ubang bilanggo. Giawhag usab niya ang publiko nga ipahibalo dayon sa kapolisan kung duna silay makitang mga kadudahang tawo sa ilang lugar. (BANAT NEWS)