CEBU, Philippines - Patay ang usa ka lalaki ug naangol ang kauban niini nga gikatahong nanukol sa mga sakop sa Provincial Intelligence Branch sa Cebu City Police Office nga modakop unta kanila tungod sa kasong murder sa barangay Poblacion sa lungsod sa Asturias kagahapon sa hapon.
Ang namatay giila lang sa pangalan nga “Edgar†ug naangol ang kauban niining si Jonathan Rubi nga gikatahong lumad sa Mindanao.
Matud pa ni Senior Insp. Armando Labora nga padulong unta nila nga dakpon ang duha pinasikad sa warrant of arrest nga giluwatan ni RTC Branch 25 Judge Sylvia Paderanga sa kasong murder.
Sumala pa nga nasigpatan nila sa sitio Lolang, barangay Looc Norte sa lungsod sa Asturias ang maong mga suspetado apan nanukol ug namusil ug maayo na lang nga mikagar ang armas hinungdan sa nahitabo nga ginukdanay.
Matud pa nga na-corner ang mga suspetsado sa may Poblacion duol sa usa ka gasoline station hinungdan nga nasikop ang usa ug gidala sa Vicente Sotto Memorial Medical Center.
Sumala pa nga nag-abang og balay ang maong mga suspetsado sa sitio Lolang sa miaging semana.
Duha ka mga KG-9 submachine pistols nga may mga bala ug duha ka calibre 45 nga pistol ang nakuha gikan sa duha.
Gidudahan nga gun-for-hire ang maong mga lalaki ug matud pa nga dunay target nga usa ka inilang tawo sa maong lungsod.
Apan matud pa nga nakabantay ang maong inilang tawo ug daling mitawag sa kapolisan ug nahibaw-an nga ang usa sa mga suspetsado dunay warrant sa kasong murder. Ang kapolisan wala mohatag og kabahin sa maong insidente. (BANAT NEWS)