CEBU, Philippines - Supak si Konsehal Philip Zafra nga ang mga Barangay Environmental Officers (BEO) sa lainlaing barangay dinhi sa dakbayan sa Sugbo paapilon sa pagpanglimpyo sa mga basura.
Si Zafra, presidente sa Association of Barangay Councils (ABC) miingon nga ang mga BEO gitahasan sa pagpanakop niadtong mga tawo nga magpataka lang pagpanglabay sa ilang mga basura sa publiko nga mga dapit.
Ang gikabalak-an ni Zafra mao nga dili na unya sila epektibo sa pagpatuman sa balaud sa pagdakop sa mga magpataka’g labay sa mga basura.
Apan walay pagsupak ang hepe sa Department of Public Services (DPS) sa dakbayan sa Sugbo sa sugyot nga usbon ang trabaho sa mga Barangay Environmental Officers (BEO) ug paapilon na sila sa pagpanglimpyo.
Si Engr. Rolando Ardosa miingon nga nindot kaayo ang mao nga sugyot aron maepektibo ang kampanya sa dakbayan ug kabarangayan kabahin sa paglimpyo sa palibot.
Nabantayan nga dunay uban nga mga BEO nga igo lang magbarug-barog ug tan-awon lang nila ang mga basura nga anaa gipanglabay sa daplin sa mga karsada.
Ang mga BEO nga gidistino sa lainlaing mga barangay gitahasan pagpanakop sa mga tawo nga ilang masakpan nga magpataka’g panglabay og mga basura sa wala itugot nga dapit.
Matag barangay adunay ‘tag lima ka BEO mao nga dul-an sa 300 ka BEO nga nadistino sa 52 ka barangay nga ania mahimutang sa urban areas. (BANAT NEWS)