CEBU, Philippines - Mokabat sa P330 milyones ka pesos ang kantidad sa sud sa 451 ka mga container vans nga gi-abandonar sud sa dugay nang panahon sud sa Cebu International Port o CIP.
Si BOC OIC Commissioner John Philip Sevilla ug Cebu Customs District Collector (Ret.) Gen. Roberto Almadin ang tipik sa 451 ka mga container vans nga giabandonar na sa tag-iya niini nga nakalapas sa Tariff and Customs Code.
Ang maong mga kargamento miabot sa Sugbu nga walay "import permit" ug milapas na sa 30 ka adlaw nga wala na kini kuhaa sa tag-iya.
Matud pa ni Atty. Paul Alcazaren adunay kapin sa 1,300 ka mga container vans ug 451 niini nailhan na sa BOC kung kinsay mga tag-iya ug gikatakdang pasakaan na og kaso. Nakita ni Sevilla walay mga import permits ang mga container vans ug milapas na kini sa 30 ka adlaw nga tagal aron kuhaon sa mga tag-iya sa milabay’ng tuig hinungdan nga kini gikumpiskar sa Customs.
Gimando dayon ni Sevilla ang pagpasubasta sa maong mga kargamento sud ning unang kwarter ning tuiga.
Lakip sa giablihan ni Sevilla mao ang mga imported nga ginamit nga ligid, ukay-ukay ug mga sinakong bugas nga miabot niadtong bulan sa Septiyembre ngadto sa October 2013. Lakip sa gisusi ni Sevilla mao ang mga chop-chop nga sakyanan nga nangalata lamang sud sa CIP gumikan sa init ug ulan.
Mibahad usab si Sevilla niadtong mga sakop sa BOC nga malambigit sa pagpangurakot sama sa pagdawat og mga suborno nga lutoson sila sa balaod.(/EIM)(BANAT NEWS)