Ex-con misuway og lugos sa silingan
CEBU, Philippines - Usa ka 27-anyos nga ginang ang gisuwayan og lugos sa usa ka ex-convict nga napriso na kaniadto sa kasong pagpanglugos diha sa barangay Calaboon lungsod sa Dumanjug alas 3:00 sa kaadlawon sa miaging adlaw. Nadakpan ug mabalik na usab sa prisohan ang suspetsadong si Glen Pasquil, kinsa bag-o lang nakagawas gikan sa Cebu Provincial Detention and Rehabilitation Center gumikan usab sa kasong pagpanglugos.
Base sa imbestigasyon nga gihimo ni PO2 Marithel Fernandez sa Dumanjug Police Station, nakita nga ang biktima nahinanok og katulog tupad sa iyang duha ka anak dihang nakabantay kining anaa na sa sud sa ilang kwarto ang suspek nga armado og mahait nga hinagiban.
Matud pa mibahad kini nga dunay dautang mahitabo kanila kun mopalag ug dihadiha gisugdan na kini sa iyang dautang tinguha apan nakahigayon pagpaak ang biktima sa ngabil niini ug diretsong gipasiga ang suga dungan sa pagsiyagit pagpangayo og tabang hinungdan nga mikaratel og dagan ang suspek.
Si SPO1 Willer Sayson sa Dumanjug Police Station, naghimo og hot pursuit operation apan nakaikyas ang suspek.
Si PO1 Mauro Dagle nga nahinabi sa Banat News miingon nga gidala sa pink room sa Vicente Sotto Memorial Medical Center ang ginang alang sa iyang medical examination.
Wala ang bana sa biktima nianang pagkahitabo tungod nagtrabaho kini sa laing nasud. Sigun ni Dagle nga nakasulod ang suspetsado sa panimalay sa biktima pinaagi sa pagkuha sa mga bildo sa bintana. (/EIM) (BANAT NEWS)
- Latest
