CEBU, Philippines - Dul-an na sa P40 milyones ang nahatag sa Department of Social Welfare and Development ngadto sa mga nabiktima sa bagyong Yolanda.
Si Kerwin Macopia sa DSWD-7 nga nahinabi sa Banat News miingon nga dinhi pa lang sa Sugbu, 153,593 family food packs na ang ilang nahatag nga paigo sa lima ngadto sa unom ka tawo sud sa tulo ngadto sa lima ka adlaw.
Dugang ni Macopia nga hangtod karon padayon pang naghatag og tabang ngadto kanila apan nag-agad na lang sila sa request gikan sa mga local nga kagamhanan kun duna pa bay angay nga tagaanan sa ilang mga lugar.
Sumala pa ni Macopia nga prayoridad karong panahona sa DSWD ang mga vulnerable families kon katong mga biktima nga hangtod karon wala pay mga trabaho.
Hangyo ni Macopia sa mga pribadong tawo nga motabang gihapon kanila sa pagputos sa mga family food packs aron padayon silang makapanghatag og daghang hinabang sa nagkinahanglan. (BANAT NEWS)